BUTUAN CITY – Subling ipahigayon sa Cebu City ang Miss Asia Pacific International 2026, nga ikaduhang sunod-sunod nga tuig nga ang “Queen City of the South” ang host sa maong internasyonal nga pageant.
Kini na ang ika-42 edisyon sa international beauty pageant, nga gitukod sa Manila niadtong 1968 ug giila isip unang international beauty pageant nga naggikan sa Asya.
Sa miaging tuig, mahinumduman nga naputos sa kahadlok ang mga kandidata human gitay-og sa 6.9 magnitude nga linog ang Cebu.
Imbis tradisyunal nga kompetisyon, nahimo kini nga charity ug outreach efforts diin ang mga kandidata nagtimbayayong sa pagtabang sa mga naapektuhan.
Karon, ang korona gikuptan ni Isabela Fernandes sa Brazil human sa kadaugan ni Francielly Ouriques.
Ang Pilipinas nagpabiling nanguna sa kasaysayan sa pageant, nga nakadaog og lima ka korona sukad nga kini nagsugod isip Miss Asia Quest.
Karong tuiga, dala sa pasundayag ang temang “Beauty Bridging the World,” nga nagtumong sa paghiusa sa nagkalain-laing kultura pinaagi sa beauty ug pagkahiusa.
