BUTUAN CITY – Misangpot sa eskandalo ang unta tam-is nga selebrasyon sa Valentine’s Day kagahapong adlawa human gipabilanggo sa usa ka mister ang iyang 22-anyos nga misis dihang nabulabog ang hilom nga kinaguray ni misis ug iyang 18-anyos nga kabit didto sa Cotabato City.
Migawas sa imbestigasyon sa Cotabato City Police Station 2, nga ang misis nga si alyas Lams ug ang iyang kabit nga si alyas Toto, parehong taga-Brgy. Rosary Heights 11 sa Cotabato City, nagtagbo sa usa ka iladong inn aron tagbawon unta ang ilang kaugalingon bisan og bawal ang ilang relasyon.
Dihang kamulo na sa ilang gihimo nga parehong wala’y sapot, kalit nga mibutho ang mister rason nga naputol ang ilang pagtagay sa kalipay ug tungod sa kalagot, gikulata sa bana ang lalaki adiser gidala sa police station ang duha.
Nasayran pa nga gi-uban diay ni misis sa inn ang ilang anak apan gipatulog una niya kini sa pikas kwarto adiser misulod sa kwarto diin naghulat ang 18-anyos nga ulitawo ug didto nakigkagod.
Kasong pagpanapaw ang ipasaka sa mister batuk sa duruha.
