BUTUAN CITY – Gisuspende sa Vatican City sulod sa usa ka buwan ang misa sa kinatibuk-ang Italya tungod sa gipatumang lockdown sa kagamhanan mugna sa coronavirus disease 2019 kon Covid-19.
Sa eksklusibong interview sa Bombo Radyo Butuan kang Fr. Joseph Capon, taga Tubay, Agusan Del Norte nga karon atua na sa Vatican City, gikumpirma niining naka-lockdown na usab ang mga simbahan rason nga solong nagmisa ang Santo Papa sa chapel sa Casa Santa Marta, sa Vatican hotel diin kini nagpuyo.
Gimanduan silang dili mogawas sa mga balay o kumbento diin kinahanglan pang mangayu og police clearance ugaling dunay lakwon bisan sa pag-adto sa ospital.
Gisirad-an usab ang halos tanang mga establisamiento sama sa mga eskwelahan, bangko, hotels, tugpahanan, coliseum og uban pa.
Tungod niini, nangreklamo na usab ang mga OFWs tungod kay dili naman sila makapadala og kwarta sa ilang pamilya dinhe sa Pilipinas.
Dugang pa ni Fr. Capon nga naka-red alert karun ang Italya batuk sa Covid-19 ilabina kay halos 500 na ang namatay og kapin sa 9-mil ang nataptan diin muabot sa 700 sa mga niini ang kritikal ang kondisyun.
