BUTUAN CITY – Gitin-aw ni Capt. Rodulfo Cordero, CMO Officer sa 402nd Brigade Philippine Army nga walay kalambigitan ang mga sundalo sa nahitabong kamatayon sa tulo ka mga bata sa Purok 6, Sitio Neptune, Brgy. Diatagon, Lianga, Surigao del Sur human mibusikad ang ilang gidulaan nga bala sa M203.
Sumala pa sa opisyal, nahitabo ang insidente sulod sa panimalay ni Reger Galdiano, usa ka sibilyan ug distansiya lang ang patrol base sa 75th Infantry Battalion.
Pagbutyag pa niini, mismo ang amahan sa mga biktima ang natingala kung asa nakuha ang maong bala tungod kay wala man siya nagtinar niini. Nailhan ang mga biktima nga sila Renz Galdiano, 3-anyos ug igsoon niining si Reden Galdiano, usa ka tuig apil ang pag-umangkong si Rynna Tiu, 12-anyos kinsa maoy nagbantay sa duha ka mga bata.
Pagkumpirma pa ni Capt. Cordero nga on-the-spot nga nakabsan sa kinabuhi ang mga biktima sa dihang mibusikad ang gidulaang bala sa M203 ni Rynna. Pagduda pa sa opisyal nga napunitan lang ang maong bala.
Alayon sa maong panghitabo, naghatag ug personal nga tabang ang kasundaluhan ngadto sa pamilya ug gitabangan usab nila kini nga makadool sa lokal nga kagamhanan aron makapangayu ug suportang pinansiyal.
Gipahayag nalang sa opisyal nga ma-trigger sa pagbusikad ang maong bala kung kini mabutang sa kalayu, dokdokon ug martilyo o kaha mahagbong nga ma-igo sa gahe nga butang. (Mon Aplaya)
