BUTUAN CITY – Gikoronahan kagabii isip Miss Grand Philippines 2025 atol sa grand coronation night nga gipahigayon sa Mall of Asia Arena sa Pasay City ang heavy favorite nga pambato sa Pampanga nga si Emma Mary Tiglao.
Mipatigbabaw ang ka-anyag ni Tiglao gikan sa laong 28 ka mga kandidatang nagtinguha usab sa maong korona. Gikoronahan siya nila Miss Grand International 2024 CJ Opiaza ug ALV Pageant Circle national director Arnold Vegafria.
Gawas sa maong korona, nakuha usab ni Emma ang mga special awards sama sa Best in Swimsuit, Best in Evening Gown, Miss Charity ingon man ang mga sponsor awards sama sa Miss Bench, Miss Monarch Montage, ug Miss Grand Hot Babe.
Tungod sa maongkada-ugan, irepresenta ni Emma ang Pilipinas alang sa Miss Grand International 2025 pageant nga himuon sa Bangkok, Thailand karong Oktubre. Target niyang makuha ang back-to-back win alang sa atong nasud sunod sa kada-ugan ni CJ Opiaza ning mi-aging tuig.
