Mga rebel surrenderees nga gikan sa Malacañang, mipauli sa Mindanao nga puno sa kalipay

BUTUAN CITY – Malipayong nanguli sa nagkada-iyang bahin ning pulo sa Mindanao ang 123 ka mga rebel surrenderees human ang tulo ka adlaw nga pagsuroy-suroy sa kauluhang Manila apil na sa Malakanyang.

Gibutyag ni Capt. Rodulfo Cordero Jr., Civil Military Operations kon CMO officer sa 401^st Brigade, Philippine Army, dili matukib ang kalipay nga gibati sa maong mga kanhi rebelde tugod kay human og libot kanila sa palasyo sa Malakanyang og naka-uban sa panihapon si Pangulong Rodrigo Duterte, gihatagan pa sila og kwarta sa pangulo aron duna’y magamit sa ilang pagsuroy sa Mall of Asia ilabina sa pagpalit og pasalubong alang sa ilang pamilya.

Mipa-uli ang maong mga kanhi rebelde nga hayag ang panagway tungod sa saad ni Pangulong Duterte nga i-apil sila sa long-term program sa militar nga mas gipanindot pang Comprehensive Local Integration Program kon CLIP.

Ilalom sa maong programa, hatagan usab sila og proyektong pabalay gawas pa sa hinabang pinansyal nga ilang magamit sa pagsugod og bag-ong kinabuhi.