BUTUAN CITY – Nagpadayon karon ang libreng HIV test sa Police Regional Office kon PRO-13 alang sa mga pulis ning rehiyon nga gustong masayod kung duna sila sa maong sakit o wala.
Sigon ni Joy Morano – presidente sa PRO-13 Press Corps ning rehiyon, ang voluntary nga HIV test mao ang pinaka-una sa kasaysayan sa kinatibuk-ang PNP. Adiser matud pa ang mismong HIV test, gipahibalo pa og una ngadto sa mga pulis ang kamahinungdanon niini.
Ka-abag sa PRO-13 ang Butuan Medical Center og ang Department of Health kon DOH-Caraga kinsa maoy mupasabot sa importansya sa maong kalihukan og aron masilsil sa huna-huna sa mga Caraganons nga dili kini angayang kahadlukan.
Ang nasangpit nga programa nga gibansagan og ‘I’m a Member of the PNP, I am Brave to take HIV Test,’ magsilbing hagit ngadto sa kapulisan aron usab awhagon ang publiko nga dili angayang kahadlukan ang maong test.
Dako matud pa kini og matabang tungod kay higayong masayrang positibo sa maong sakit ang usa ka indibidwal, mahatagan gilayon siya og medikasyon aron dili na kini mu-develop pa ngadto sa AIDS kansa mas delikado na hinuon tungod kay dili naman matambalan pa.
Gidugang ni Morano nga na-initiate ang maong kalihukan human nakita ang dakong kontribusyon sa mga pulis diha sa mga blood-letting activities diin ubay-ubay nga mga pulis ang magdonar sa ilang dugo.
Kini matud pa ang rason nga kinahanglang masayod usab ang publiko sa estado sa dugo nga idonar sa mga pulis sa ingon mawala ang kabalaka kung luwas ba ang ilang dugo. (Beth Ruiz)
