BUTUAN CITY – Ipadayon sa Department of Environment and Natural Resources kon DENR-Caraga ang mga programang nasugdan na pagpatuman ni kanhi DENR-appointed Secretary Gina Lopez alang sa Caraga Region.
Kini ang gipadayag ni Charlie Fabre sa pakighinabi ning sibyahan human ang pagbasura sa gamhanang Commission on Appointments sa iyang katudluan isip kalihim sa maong ahensya.
Gibutyag sa opisyal nga sulod sa mga buwan nga nagka-uban sila pagtrabaho sa maong ahensya, nakita niya ang ka-passionate ni Lopez nga maprotektahan ang kina-iyahan.
Bisan og sayang nga wala makumpirma ang katudlu-an ni Lopez sa maong posisyon, apan dili matud pa kini babag aron dili ipadayon pagpatuman ang mga proyektong napatuman na niini.
Gawas sa regular programs sa ilang ahensya, sundon gihapon sa ilang rehiyunal nga buhatan ang mga gipakanaog nang kamanduan ni Lopez nga na-isyuhan na og department administrative order.
Samtang sa hungihong nga usa ang Cabadbaranong si Atty. Mark Tolentino sa mga posibleng itudlo ni Pangulong Duterte alang sa maong posisyon, gibutyag ni Fabre nga base sa iyang nakitang records kang Tolentino, kwalipikado usab kini sa nasangpit nga posisyon.
Higayong makatudlo na ang pangulo og musunod sa nabiyaang posisyon ni Lopez, gipadayag ni Fabre nga mas maayong pilion niini ang mga concerns sa katawhan alang sa palibot og kina-iyahan pg ekonomiya kondiin mabalanse og maayo ang pagpadagan sa maong ahensya.
Samtang wala pa magpadayag og reaksyon ang kampo ni Atty. Tolentino kalabot sa nabani-og nga posibleng paghulip niya kang Lopez.
Gibutyag ni Arnel Ducot – enior staff ni Atty. Tolentino nga gitimbang-timbang na karon ang nasangpit nga abogado kung dawaton ba niini ang nasangpit nga posisyon higayong pormal na kining ihanyag ngadto kaniya. (Beth Ruiz)
