BUTUAN CITY- Sa pipila ka bantugang merkado sa India, usa ka talagsaong baligya ang nagpadayon ang pagpamaligya sa mga pustiso o “dentures” nga gigamit na kaniadto sa mga tawo nga namatay na.
Sumala sa mga taho, kini nga mga pustiso gikuha gikan sa mga ospital o bisan sa mga lubnganan, dayon limpiyohan ug ipailalom sa proseso sa pag-ayo aron mahimong magamit pag-usab. Human niini, gibaligya kini sa mas barato nga presyo kumpara sa bag-ong dental treatment.
Ang hinungdan niini mao ang kakulang sa kwarta sa daghang katawhan. Alang sa milyon-milyon ka mga indibidwal nga dili makaya ang mahal nga serbisyo sa dentista, kini nga alternatibo mao ra ang ilang paglaum aron makakaon ug tarong ug mabalik ang ilang pahiyom. Bisan pa man sa katingad-an nga gigikanan sa mga pustiso, daghan gihapon ang mopili niini tungod sa panginahanglanon.
