BUTUAN CITY -Nanawagan ang World Health Organization (WHO) sa mas hugot nga aksyon batuk sa tuberculosis (TB) sa Western Pacific Region, taliwa sa padayon nga milyones nga kaso sa sakit.
Sa paghandum sa World Tuberculosis Day 2026, gihagit Dr. Huong Tran ang mga nasud nga pakusgon ang primary health care, palapdan ang access sa diagnostics, ug ipadool ang mga serbisyo sa komunidad.
Base sa datos, gibana-banang 2.9 milyones katawo ang apektado sa TB sa rehiyon niadtong 2024 lakip ang Pilipinas, Indonesia, ug China sa mga nasud nga dunay pinakataas nga kaso.
Pamugos ni Dr. Saia Ma’u Piukala nga kayang makab-ot ang pagtapos sa TB sa Western Pacific Region ugaling pakusgon ang pag-atiman, og e-centralized ang mga serbisyu.
Gitumbok sa WHO nga importante ang panag-hiusa sa TB services sa primary health care aron mapadali ang diagnosis ug malikayan ang pagkuyanap sa sakit ilabina sa mga bulnerableng sektor. Lakip sa giduso ang paggamit sa mga bag-ong molecular tests para sa mas paspas ug mas saktong pagtumbok sa TB, lakip ang drug-resistant cases.
Bisan paman niini, nagpabiling hulga ang kakulangon sa pondo, pagpanigarilyo, malnutrisyon, pag-inom sa ilimnong makahubog, diabetes, ug uban pang prayoridad sa panglawas.
Pagbutyag pa sa WHO, ang pagbubu og puhunan TB programs dunay dakong mabalik diin ang matag dolyar mamahimong magbunga og hangtud sa 43 dolyares sa benepisyong panglawas ug ekonomiya.
