BUTUAN CITY – Gihimong pangpa-good vibes karon sa pamilya Limpiado sa Brgy. Obrero ning siyudad sa Butuan ang unom ka mga dagkonh haw-an nga naglangoy-langoy kilid sa nabahaan nilang balay.
Kini tungod kay kung tawgon sa ilang pangalang ‘Dodo’ og kamayon ang maong mga isda, mangduol kini.
Sigon ni Daday Limpiado, gagmay pa ang maong mga isda dihang naka-abot sa ilang lugar hangtud nga kada-adlaw na niya kining bahugan aron duna’y mukaon sa mga kiti-kiti sa maong tubig.
Dinhi na matud niya na gisugdan ang pagtawag kada-buntag sa maong mga isda hangtud nga mangduol na kini kung ilang tawgon alang sa pagpangaon.
Duna matud pa’y higayon nga manglayat kini sa ilang kusina higayong gutmon na. Wala sila’y planong dakpon og pangan-on kini tungod kay maghatag kini kanila og lingaw gawas nga gikonsidera usab nila kining swerte.
