BUTUAN CITY – Ipadala sa Gymnastics Association of the Philippines kon GAP ang duha ka banggiitang gymnasts sa prestihiyosong World Cup Series Baku Leg nga himoon sa Milli Gimnastika Arensi sa Baku, Azerbaijan sugod sa Marso 5 hangtud sa Marso 8.
Manguna sa kampanya sa Pinoy gymnasts si World Junior Championships bronze medalist Karl Eldrew Yulo kauban si SEA Games gold medalist Ivan Cruz.
Positibo ang kadumalahan sa Gymnastics Association of the Philippines sa mahimong kampanya sa Pinoy gymnasts ilabina kay sobsob ang nahimong pagpangandam niini adiser ang torneo.
Maka-agbat nila Yulo ug Cruz ang mga dagkong pangalan sa gymnasts sa tibook kalibutan.
Kini ang unang higayon nga makit-an si Yulo sa seniors division.
Tungod niini, mamahimo nang mosalmot si Yulo sa sunod nga edisyon sa Southeast Asian Games sa Kuala Lumpur, Malaysia sa sunod tuig ug sa 2026 Asian Games nga ipahigayon usab sa Nagoya, Japan.
Ulahing nasaksihan ang aksyon ni Yulo sa FIG Junior World Championships nga gipahigayon sa Maynila niadtong Nobyembre diin nakakuha kini og duha ka bronze medal sa floor exercise ug horizontal bar.
