BUTUAN CITY – Wala’y bisan usa sa gi-imbitar nga mga cabinet secretaries ug undersecretaries ang mitunga sa ikaduhang pagdungog sa Senate Committee on Foreign Relations pagpanguna ni Senadora Imee Marcos kaganina aron unta pangayuan pa og dugang pagpasabot kalabot sa pagpa-aresto sa gobyerno kang kanhi Pangulong Rodrigo Duterte ug gitugyan pa ngadto sa International Criminal Court kon ICC.
Sa iyang opening statement, gipasumbingay pa sa senador nga ang kamatu-uran, susama kini sa anino nga bisan asa ka mu-adto, kanunay kining anaa sa likod ug ang paglikay sa kamatu-uran susama usab matud pa kini sa interest sa utang nga kung dili mabayran, magkadako ang atraso.
Mahimo matud pang malikayan karong adlawa sa mga responsable sa pagpadakop sa kanhi pangulo ang ilang tulubagon sa legalidad niini, apan mu-abot gihapon ang adlaw sa pagpaningil.
Gisaway pa sa senadora ang dili magkatukma nga pamahayag sa mga executive officials ilabina kadtong gipadayag ni Palace Press Officer Claire Castro nga dili matud pa pugngan ni Pangulong Ferdinand ‘Bongbong’ Marcos Jr. ang mga cabinet secretary kung ipatawag sa mga pagdungog, tungod kay bali ang nahitabo sa maong pagdungog kaganina.
