Gibisita ni Pangulong Rodrigo Duterte ang syudad sa Surigao human kini gitay-og ug magnitude 6.7 nga linog ning miaging gabie.
Sa iyang pagpamulong atubangan sa mga biktima sa linog, mipasalig kini nga tabangan ang mga apektado sa kalamidad hilabi na ang mga namatyan, nawad-an ug pinuy-anan lakip na trabaho.
Gibutyag pa niini nga sa iyang paglantaw sa katibuk-ang epekto sa linog sa maong syudad, dili matud pa kaayo kini grabe kung itandi sa nahitabo sa Tacloban atol sa paghapak sa Bagyong Yolanda maoy hinungdan nga dili matud pa angayang maguol pag-ayo ang mga nahimong biktima sa linog.
Subay niini, iya na matud pa nga gitahasan ang tanang hingtungdang ahensya sa paghimo gilayon ug aksyon alang sa pagtabang sa mga biktima sa linog.
Samtang gibutyag usab ni Department of Social Welfare and Development ( DSWD ) Sec. Judy Taguiwalo nga muabot sa 1.5-bilyon pesos ang gitagana karon sa ilang ahensya aron itabang ngadto sa mga biktima sa linog.
Gani, nakatunol na matud pa sila ug tabang pinasyal sa balor nga 10-mil pesos wala pa’y labot ang tabang pinansyal usab gikan sa opisina ni Pangulong Duterte ngadto sa mga namatyan sa maong kalamidad.
Padayon usab karon ang pagpang-apod-apod ug mga relief goods ngadto sa mga nahimong biktima sa linog.
