BUTUAN CITY – Pabor si kanhi Senate President Aquilino ‘Nene’ Pimentel sa pag-amyenda sa batakang balaud apan kinahanglang himuon kini pinaagi sa Constitutional Convention (ConCon) og dili sa Constituent Assembly (ConAss).
Sa exclusive interview sa Bombo Radyo Butuan, gipadayag sa kanhi senador nga mas maayo ang pag-amyenda sa konstitusyon pinaagi sa Con-Con tungod kay sila ang mupili og mga delegadong muhimo sa charter change og masegurong dili self-serving ang maatigayong amendments.
Apan gipadayag ni Pimentel nga kung ConAss ang gusto ni Pangulong Duterte alang sa charter change, kinahanglang open to the public og duna’y media coverage sa himuong pagpasabot ngadto sa katawhan kalabot sa mga probisyong gusto nilang ilakip sa federalism o sa proseso sa cha-cha.
Gipamugos usab sa kanhi magbabalaud ang media coverage aron wala’y matago sa publiko nga mga provisions nga gusto sa administrasyon alang sa federal form of government nga posibleng ikakurat na lang unya sa mga Filipino higayong ma-aprubahan na ang cha-cha.
Partikular na niini ang gikahadlukan sa kadaghanan nga term extension sa mga government officials og ang posibleng ‘no-el’ kon no election scenario.
Apil sa mga gusto sa kanhi senador nga amendahan ang pagpili og senador nga dili na himuong nasyunal kondili pinaagi na sa federal states apil ang pagpili sa presidente og besi-presidente nga kinahanglang dungan nga pilion sa usa lang ka partido laron malikayan ang pagbaton og managlahing agenda. (Beth Ruiz)
