BUTUAN CITY – Gimanduan sa Ombudsman ang regional director sa Department of Interior and Local Government kon DILG-Caraga nga ipatuman ang ilang desisyong usa ka buwan og usa ka adlaw nga pagsuspenso kang Mayor Norbert Pagaspas sa lungsod sa Buenavista, Agusan del Norte.
Kini human nakakita og saktong ebidensya ang Ombudsman sa kasong simple neglect of duty kansa usa lang sa mga kasong gipasaka sa mga complainants nga sila Imleda Ignalig, Joselito Pesco, Celso Echevarre, Ronilo Fedelis, Daisy Medina og Emmanuel Sobrecaray – pulos empleyado sa lokal nga kagamhanan sa maong lungsod.
Nagsumikad ang reklamo sa maong mga empleyado kinsa duna’y posisyon nga engineer 1, assessment clerk II, clerk III, draftsman, messenger og utility worker I human matud pa nabiktima sa kolor sa pulitika.
Nasayrang dihang gimugna ang Municipal Sanitary Landfill Unit kon MSLU, gi-reassign sila kondiin gibutang sila sa buhatan nga nahimutang sa Dalao-an Sanitary Landfill Eco Park sa Brgy. Rizal kon mas nailang sanitary landfill.
Dako na lang ang ilang kakurat tungod kay sa ilang pag-report, ilang na-abtan ang miserableng kondisyon sa ilang buhatan kansa guba na og gipalibutan pa og mga basura gawas nga wala pa kini saktong gamit sama sa lamisa, bangko, pansayad ingon man office equipment hinungdan nga magtindog sila samtang magtrabaho og magkapuliki og tago kung magpagawas sa ilang tawag sa lawas.
Nagpa-abot matud pa sila og hangyo ngadto sa respondent apan gibalewala kini sa mayor.
Tungod sa ilang katingala sa kalit nga kamugnaan sa maong yunit apil na sa ilang reassignment og kawala’y klarong selection process sa pagpili kung kinsa ang mulangkob sa MSLU, dinhi na sila mipasaka og mga reklamong grave abuse of authority, oppression, grave misconduct, og paglapas sa Code of Conduct and Ethical Standards for Public Officials and Employees.
Sa maong mga kaso, bugtong ang simple neglect of duty lang ang duna’y saktong ebidensya hinungdan hinungdan sa desisyong suspensyon. (Beth Ruiz)
