BUTUAN CITY – Gisiguro sa Office of the Ombudsman nga hapit na nilang ipasaka ang kaso batok sa gitawag og “master plunderers” nga nalambigit sa maanomalyang flood control projects.
Kini mismo ang gipahibalo ni Assistant Ombudsman Atty. Mico Clavano atol sa usa ka press briefing sa Ombudsman kabahin sa mga kasong giandam may kalabotan sa korapsyon.
Sumala pa niini, hapit na ipasaka sa korte ang kaso batok sa mga gitawag nga “master plunderers” sa anomalyang flood control.
Sigon pa ni Ombudsman Spokesperson Atty. Mico Clavano, ang duha ka “master plunderers” nga iyang gipasabot mao ang usa ka kanhi Speaker sa House of Representatives ug usa ka kanhi Senate President.
Gawas sa duha ka kanhing taas nga lider sa Kongreso, adunay pipila usab ka mga senador ug kongresista nga kasuhan.
Apan bisan pa og hapit na sila kasuhan, wala pa gipadayag ni Assistant Ombudsman Clavano ang eksaktong petsa kung kanus-a kini ipasaka. Gipasabot niini nga gusto sa Ombudsman nga masiguro nga lig-on ug bug-at ang kaso nga ilang isang-at.
Una nang gipahibalo ni Ombudsman Jesus Crispin “Boying” Remulla ang kabahin sa pagpasaka sa kaso.
Gihisgutan niya nga kasuhan sila kanhi House Speaker Martin Romualdez ug kanhi Senate President Chiz Escudero.
Kasong plunder ang giandam nga ipasaka sa Office of the Ombudsman batok sa duha ka kanhing lider sa Kongreso.
