BUTUAN CITY – Gikostudiya na sa Marawi City Police Station ang managsoong Olaran kinsa nadakpan dinhi sa Butuan City human nanibat dihang gitulis-patay ang magti-ayon nilang among Maranos Muslims sa Marawi City.
Gi-ila ni Marawi City Police Station commander Lt Col. Muhidin Pagayawan ang mga suspetsadong sila Jewel ug Jemuel Olaran, hingkod ang edad ug kanhi mga trabahante sa magti-ayong Usodan ug Baira Monte, tag-iya sa usa ka restaurant sa Barangay Sarimanok, Marawi City, Lanao del Sur.
Dugang sa opisyal, natud-an ang duha samtang nagtago sa Brgy. Holy Redeemer, ning siyudad sa Butuan human sila nakig-alayon sa Butuan City Police Office ingon man si Marawi City Mayor Atty. Majul Gandamra ngadto sa city government sa Butuan.
Nasayrang nakit-an na lang sa ilang anak ang magti-ayong Monte nga nagkadugo ug wala na’y kinabuhi rason nga daling gilusad ang lapad nga operasyon hangtud nga natud-an ang ilang lokasyon sa Butuan City.
Nasuta sa imbestigasyon sa crime scene nga daghang mga alahas ug kwarta sa mga biktima ang nadala sa managsoon kinsa gipasakaan na og kasong homicide with robbery.
