BUTUAN CITY – Magsunod sa order of charging, base sa Administrative Order 2025-011 ang mga partner hospitals o kaha local government units nga duna’y memorandum of agreement tali sa Department of Health kon DOH alang sa pagpatuman sa Medical Assistance to Indigent and Financially Incapacitated Patients kon MAIFIP Program.
Sa eksklusibong pakighinabi sa Bombo Radyo Butuan, gipadayag ni registered nurse Mary Angeline Tangga-an, nga dugay nang gipatuman ang maong programa niadtong tuig 2010 apan na-usab lang ang pangalan paglabay sa mga katu-igan ug karon, gi-revise na usab ang guidelines niini.
Giklaro niini nga kung na-admit ang pasyente, magsubmite lang kini og hospital bill ingon man kopya sa iyang valid identification kon ID apan kung wala niini, mahimong mangayo kang og medical social referred ID o kaha barangay residence certificate ilabina niadtong mga nagpuyo sa lagyo kaayong lugar.
Apan kung wala gayod, mahimong ipresenta ang balidong ID sa sunod niining kabanay.
Ubos matud pa sa maong programa, makaproseso gihapon og assistance alang sa mga tambal, apil na ang mga prescribed medicines nga aprubado sa Food and Drugs Administration.
