BUTUAN CITY – Nagpabilin una sa kustudiya sa Kitcharao Municipal Police Station ang nadakpang magti-ayon nga gitoohang recruiter sa walhong grupo adiser kini dalhon sa Bureau of Jail Management and Penology kon BJMP.
Giila ni SPO1 Mat Morales ang mga suspetsado nga sila Luzviminda Apolinaria, 45-anyos ug Aladin Apolinaria, 49-anyos nga parehong miyembro sa NPA Party Branch sa Sangay ng Partido sa Platun16A sa Guerilla Front 16 sa Northern Mindanao Regional Committee (NMRC) nga taga Purok 7, Brgy Mahayahay, Kitcharao, Agusan del Norte.
Gihimu ang hiniusang operasyon sa PNP Regional Mobile Forces Battalion 13 ug 29th Infantry (MATATAG) Battalion, Philippine Army dala ang warrant of arrest sa paglapas sa Republic Act (RA) No. 9208 as amended by RA10364, mas naila usab nga Expanded Anti-Trafficking in Persons Act of 2012 ug RA7610, Anti-Child Abuse Law.
Ang warrant of arrest gi-isyu sa 10th Judicial Region Branch 34, Cabadbaran City, Agusan del Norte nga walay girekomendang piyansa, gi-silbi kagahapon sa alas 10:35 sa buntag.
Sumala pa ni SPO1 Morales, ang nasangpit nga magti-ayon ang nagdani matud pa sa kanhe rebelde nga si Glenie Omahas nga nailang si KA Dave, Garry Alimboyong alyas ka John ug Rudy Alimboyong Ka Bunso nga misurender sa niang Disyembre 2016.
Ang nasangpit nga mga kanhe rebelde, mga minor-de-edad pa sa dihang misampa sa Militiang Bayan. Giklaro ni SPO1 Morales nga gipailalom sa monitoring ang duha ka suspetsado nga maguuma.
