BUTUAN CITY – Patay ang magti-ayon samtang angol ang duha nila ka mga anak human midasmag ang ilang gisakyang traysikol ngadto sa nakaparadang cargo truck sa may Brgy. Luna, Surigao City kagabii.
Gi-ila ni P/Supt. Jay Baybayan ang mga namatay nga sila Jonie Labandero, 30-anyos og ang 22-anyos nga asawa niining si Jennifer, residente sa maong barangay.
Nasayrang panaog na ang traysikol nga gisakyan sa mga biktima nga gimanehuan ni Jonie kondiin nawad-an matud pa kini og kontrol hinungdan sa pagdasmag niini ngadto sa nagpatubil nga trak.
Tungod kay panaog, kusog-kusog ang dagan sa maong sakyanan hinungdan nga maayong pagkadamyos sa traysikol resulta sa on-the-spot nga pagkamatay ni Jonie samtang sa ospital na nakabsan sa kinabuhi ang asawa niini.
Padayon pang nagpa-alim sa ospital ilang mga anak nga nag-edad og 2 og 4-anyos human sa hitabo nga natigayon pasado alas-6:30 kagabii. (Beth Ruiz)
