BUTUAN CITY – Padayon pang gipakisayran sa mga otoridad ang identity sa mga responsable apil na ang motibo sa pagpusil-patay sa usa ka tribal council member sa tribong Mamanwa sa lungsod sa Alegria, Surigao del Norte.
Sa eksklusibong interview sa Bombo Radyo Butuan kaang PO2 Alan Badajos sa Alegria Municipal Police Station, gi-ila niini ang biktimang si Guillermo Biog Tiambong, 58-anyos, minyo og residente sa Purok 5, Brgy. Budling sa maong lungsod.
Gipadayag sa asawa sa biktimang si Victoria nga nahitabo ang insidente bandang ala-una kagahapon sa hapon Purok 4 sa Brgy. Camp Edward samtang didto sila sa ilang ilaya kon umahan.
Nag-ani matud pa ang iyang bana og karlang dihang kalit na lang siyang nakadungog og mga buto sa armas og sa iyang pagsusi, nakita na lang niining nagbuy-od na og wala na’y kinabuhi ang iyang bana.
Naka-angkon kini og samad-pinusilan sa likod sa iyang ulo og gagmay’ng mga samad sa iyang lawas hinungdan nga gitu-uhang shot gun ang gigamit sa wala pa mailang suspetsado.
Wala matud pa’y kaaway ang biktima og ang pagtambong niini sa tribal summit ning mi-aging semana sa Davao City ang usa sa mga gilantaw nga anggulo sa kremin. (Melody Valledor)
