BUTUAN CITY – Magpagawas ang Land Transportation Office (LTO) og Show Cause Order batok sa BMW Owners’ Society of Safe Riders (BOSS), organizer sa Boss Ironman Challenge Mindanao Cup 2026 tungod sa paglapas sa trapiko ug paggamit og illegal nga blinkers nga nalambigit sa mga aksidente sa maong event.
Base sa mga viral videos ug ulat sa social media, adunay mga partisipante nga nag-overspeed, wala mituman sa red lights, ug wala mosunod sa road signs.
Ang pipila sa mga banggaan nahimong grabe, lakip na ang pagkamatay sa usa ka 7-anyos nga bata, ug adunay laing fatal nga aksidente sa Kibawe, Bukidnon nga giimbestigahan pa.
Sumala ni LTO Chief Markus V. Lacanilao, ang kaluwasan sa kalsada dili puwedeng ipasipala ug ang mga organizer sa motor events adunay legal ug moral nga obligasyon nga masiguro ang pagsunod sa traffic laws ug ang kaluwasan sa tanan.
Gipadayag sa LTO nga patubagon ang may sala, ug padayon ang imbestigasyon aron makalap ang kompletong ebidensya sa dili pa pormal nga ipagawas ang Show Cause Order.
