BUTUAN CITY – Tungod sa kapaspas sa panghitabo, wala na makagawas pang buhi ang usa ka biyudong lolo pasado alas-otso sa buntag kagahapong adlawa gikan sa iyang nasunog nga balay.
Na-ila ang biktimang si Raymundo Abalos, 90-anyos, residente sa Purok 1-F sakop sa Brgy. Bit-os ning siyudad sa Butuan.
Migawas sa inisyal nga imbestigasyon sa mga sakop sa Bureau of Fire Protection kon BFP Butuan base na usab sa asuy sa nakasaksi sa panghitabo nga nakita pa niyang nagluntod sa gawas sa balay ang biktima og dako na lang ang iyang kakurat dihang nakita niyang nagdilaab na ang gama sa light materials nga balay niini.
Gisabligan pa niya kini og tubig human makitang na-trap sulod sa kwarto ang biktima apan tungod sa kapaspas sa pagkaylap sa kalayo, wala na makagawas pa ang biktima.
Gibana-banang mukabat lang sa 5-mil pesos ang damyos sa maong sunog. (Beth Ruiz)
