BUTUAN CITY- Nagsugod na pagpangabot sa Middle East ang liboan ka mga sundalo gikan sa elite 82nd Airborne Division sa U.S. Army, samtang gihuna-huna ni U.S. President Donald Trump ang sunod nga lakang alang sa gubat batok sa Iran.
Hisayran nga ang mga sundalo, nga gikan sa Fort Bragg sa North Carolina, dugang sa unang gipadala nga pwersa sa Estados Unidos lakip ang mga Marines, Navy, ug Special Operations units. Niadtong weekend, labing-minos 2,500 ka Marines ang ming-abot usab sa rehiyon.
Gani wala pay klaro kung asa eksaktong gipadala ang mga tropa, apan gilaoman nga parte kini sa pagpangandam alang sa posibleng halapad nga operasyon.
Sa pagkakaron, wala pay final nga desisyon kung mosulod ang mga sundalong Amerikano sa Iran.Sumala sa mga taho, posibleng gamiton ang mga tropa sa nagkanda-iyang misyon, lakip na niini ang pagsakop sa Kharg Island kansa sentro sa dul-an 90% nga oil exports sa Iran dungan ang kasiguraduhang luwas nga pag-agi sa mga oil tanker sa Strait of Hormuz.
Adunay mga hungihong usab matud pa kalabot sa paggamit og ground forces aron makuha ang highly enriched uranium sa Iran, apan gi-ila kining delikado ug komplikadong operasyon.
Samtang, sigon ni Trump nga nakigpulong ang Amerika sa mas “reasonable” nga liderato sa Iran aron tapuson ang kagubot, apan mipasidaan usab kini nga posibleng mo-atake ang U.S. sa oil facilities sa Iran kung dili abrihan ang Strait of Hormuz.
Bisan pamab, ang posibleng paggamit og ground troops adunay kaubang risgo sa pulitika, hilabi na nga ubos ang suporta sa publiko sa Amerika alang sa kagubot ug kanhi na nga mingsaad si Trump nga likayan ang mga bag-ong panagbangi sa Middle East.
Sukad nagsugod ang operasyon naidtong Pebrero 28, kapin 11,000 ka target na ang gi-atake sa U.S., kung asa kapin 300 ka sundalo ang na-angol ug 13 ang namatay ubos sa Operation Epic Fury.
