BUTUAN CITY – Giklaro sa Bureau of Fisheries and Aquatic Resources kon BFAR-Caraga nga wala pa gihapon nila gitangtang ang shellfish ban sa Lianga bay sa Surigao del Sur tungod sa mga makahilo niining organism.
Ang maong ban gisugdan pagpatuman niadtong Nobyembre ning mi-aging tuig og duna’y panahon nga gitangtang ang ban sulod sa usa ka buwan apan gibalik ra gihapon tungod sa presensya sa red tide toxins.
Sa eksklusibong pakighinabi sa Bombo Radyo Butuan, gibutyag sa veterinarian sa BFAR-Caraga nga si Dr. Leona Victoria Nortega, padayon ang ilang gihimong monitoring og water sampling ka-upat matag-buwan sa maong kadagatan ilabina sa mga kasikbit nga lugar aron ilang masuta kung positibo pa ba gihapon kini sa red tide o kaha dili na.
Lakip matud pa sa mga simtomas sa mga tawong nakakaon og mga shellfishes og uban pang marine products nga kontaminado sa red tide toxins mao ang pagsuka-suka og pagbinhod sa lawas.
Gani duna matud pa’y higayon nga maparalisa o kaha mamatay ang pasyente, depende unya sa gidaghanon sa toxins sa mikontamina sa lawas. (Beth Ruiz)
