BUTUAN CITY – Temporaryong gipa-ilalom sa unom ka adlaw nga total lockdown sugod ning adlawa ang Mayor Salvador Calo Supermarket kon mas naila kaniadtong Langihan Public Market ning siyudad sa Butuan human kini gimando sa lokal nga kagamhanan.
Kini human nga tulo ka mga stall owners ang nagpositibo matud pa sa COVID-19 base sa resulta sa RT-PCR test kondiin usa kanila ang namatay.
Tungod niini, makuhaan una og kinitaan ang mga negosyante hangtud sa Agusto 31 samtang ma-apektuhan usab ang pagmerkado sa katawhang suki na sa maong merkado.
Tumong sa pagpasira sa maong merkado nga ma-disinfect kini ug mahimo gilayon ang hugot nga contact-tracing sa mga tawong duna’y close contact sa mga nagpositibo sa coronavirus.
Bisan pa man sa maong estado, duna gihapo’y pipila ka mga fish vendors nga namaligya og isda sa gawas nga bahin lang sa merkado.
