BUTUAN CITY – Personal nga kasuko ang gisubay karun sa kapulisan nga motibo sa pagpamusil patay diha mismo sa sulod sa panimalay sa may P-1 Barangay Rizal, lungsod sa Barobo, Surigao Del Sur alas 8:20 kagabii.
Sa pakighinabi kang SPO1 Val Warren Colangkus sa Barobo Municipal Police Station, gibutyag niining tataw kaayo nga hilabihan ang kasuko sa mga wala mailang suspetsado ngadto sa biktima nga si Noel Eriste-39-anyos.
Kini tungod kay giguba pa ang pultahan og bintana sa panimalay aron makasulod og wala lung-e sa pagpusil hangtud nga namatay ang biktima nga mitago sa ilalom sa katri.
Lakip sa gisubay nga hinungdan sa kremin mao ang trabaho sa biktima nga mohikay ug mga papeles sa yuta diin dunay gisaaran matud pa kini nga wala niya matuman.
Nasayran usab nga anaa sulod sa balay ang inahan sa biktima sa dihang nahitabo ang kremin.
Sigon pa ni SPO1 Colangkus, upat ka tawo nga dunay dalang mubo nga klase sa armas ang misulod sa balay sa biktima.
Walay mga tabon sa nawong ang mga niini sa dihang nakita sa mga silingan nga nagdali pagsibat padulong sa pantalan, ug misakay sa pumpboat ngadto sa wala matinong direksiyun.
Naka-angkon og daghang samad pinusilan ang biktima diin ang duha niini, diha mi-igo sa iyang ulo.
