BUTUAN CITY – Padayon pang gilusad sa Philippine Coast Guard kon PCG-Surigao, ang search and rescue operation sa usa ka ulitawo nga mi-ambak gikan sa gisakyang barkong MV Filipinas Cebu nga nagbiyahe gikan sa Surigao City padulong unta sa Cebu City.
Gi-ila ni Seaman First Class Roy Orellaneda sa PCG-Surigao, ang biktimang si Arial Manlapaz, 22-anyos, ulitawo og residente sa Tandag City, lalawigan sa Surigao del Sur.
Sa eksklusibong pakighinabi sa Bombo Radyo Butuan, gibutyag sa opisyal nga mi-ambak ang pasahero paglabay sa 37-minutos gikan sa paglarga sa barko pasado alas-siete kagabii, pagtungod nila sa Basul Island atbang lang sa Brgy. Lipata.
Ka-uban matud pa sa biktima sa pagbiyahe ang iyang maguwang kinsa blangko sa hinungdan sa iyang pag-ambak. (Beth Ruiz)
