Laing pagpamusil na usab sa Cabadbaran City, mikalas sa kinabuhi sa Engineer
BUTUAN CITY – Dili ti-aw nga kahadlok karun ang gibati ni Sanguniang Panlalawigan Member Salutario Cuasito sa Agusan Del Norte human sa laing pagpamusil na usab sa siyudad sa Cabadbaran diin usa ka engineer ang biktima sa panahon pa sa Semana Santa.
Gikumpirma ni SP Member Cuasito nga mga alas 7:00 sa gabii sa may Barangay Kalibunan, sa dakbayan sa Cabadbaran, gipusil si Engr. Irene Nakila, hamtong ang pangedaron, dunay anak ug residente sa maong siyudad kansa dead-on-arrival sa Cabadbaran District Hospital human na-igo sa ulo.
Igo lang matud pa nagpahilot ang biktima ug sa iyang pagpauli, dinhe na siya gitiro sa wala pa mailang suspek.
Pagbutyag pa sa opisyal, nagsagol na ang iyang gibati ilabina kay halos kada semana na ang natigayong pagpamusil sa maong siyudad diin ang pinaka-ulahi, usa pa gayud ka babaye.
Lakip sa gikabalaka sa opisyal ang kakulang sa kapulisan sa Cabadbaran City nga muabot lang matud pa sa 56 ka pulis nga dili gayud makahatag ug seguridad sa 31 ka mga sakop nga barangay.
