BUTUAN CITY – Wala’y hunong ang pagdayo sa mga senior ug non-senior citizens dinhi sa Bombo Broadcast Center aron lang makapangayo og libreng reading eyeglasses.
Kada-adlaw, lain-laing mga Butuanons ang mudalikyat ning sibyahan aron lang makasukod ug makadala sa ilang gikinahanglang libreng antyuhos sukad nga gisugdan kini sa unang bahin sa buwan sa Mayo.
Kini subay na usab sa tinguha sa Bombo Radyo uban sa pag-abag sa Faith Baptist Church pagpanguna ni Pastor Vicente Serrano aron maka-abag usab sa mga tigpaminawan ning sibyahan nga nagproblema sa ilang panan-aw.
Kini tungod na usab sa kasibot sa maong sekta nga makatunol og tabang isip abag na usab sa mga local government units ug ubang mga pribadong indibidwal o kompanya nga nagtunol usab og ayuda ngadto sa katawhan karong panahon sa COVID-19 pandemic gawas pa sa itunol nilang crutches.
Pulos pulong sa pagpasalamat ang gibungat sa mga nakadawat niini tungod kay gawas nga libre nila kining na-angkon, matubag na usab ang dugay na nilang gihambing problema.
