BUTUAN CITY – Nagpabiling gitago ang pagkustudiya karun sa amahan ug anak nga miyembro sa New People’s Army kon NPA human nasikop kagahapon atol sa pag-implementar sa warrant of arrest sa La Paz, Agusan Del Sur.
Tungod kini kay gikondisera nga miyembro sa Militia ng Bayan sa NPA ang mga suspetsado nga sila Crisanto Torres Mondejar nga naila usab nga Santos Mondejar, 63-anyos ug Blim Numeron Mondejar alyas Jun-Jun Mondejar, 25-anyos ug parehong residente sa Brgy. San Patricio sa maong lungsod.
Sigon ni P/Chief Insp. Renel Serrano, Regional Information Officer sa Police Regional Office kon PRO-13, nasikop ang mag-amahan sa hiniusang puwersa sa PRO13 Regional Intelligence Division, Agusan Del Sur Police Provincial Office, 26 Infantry Battalion, Philippine Army ug personahe sa La Paz Municipal Police Station.
Ang maong warrant of arrest gi-isyu ni HON. KIMAL M. SALACOP, Executive Judge sa RTC 10th Judicial Region Branch 6, Patin-ay, Prosperidad, Agusan del Sur nga dunay petsang Nobyembre 23, 2017.
