BUTUAN CITY – Gisuspende sa lokal nga kagamhanan ning siyudad sa Butuan ang face-to-face classes sugod kaganinang alas-10:00 sa buntag sa tanang level sa tanang public ug private schools.
Kini human nga mi-abot ang heat index sa 44°C sa entiro siyudad ug tumong sa suspensyon nga malikayan ang heat-related illnesses ug mapanalipdan ang mga estudyante, mga magtutudlo ug school personnel batok sa grabeng kainit. Ang maong lakang gibase sa rekomendasyon sa City Disaster Risk Reduction and Management Department kon CDRRMD, City Health Department, Department of Education-Butuan City Division ug Philippine Atmospheric, Geophysical and Astronomical Services Administration kon PAGASA-Butuan.
Samtang suspendido ang face-to-face classes, gidasig usab ang mga eskwelahan nga mugamit og laing paagi sa pagkat-on sama sa modular learning, performance tasks, projects, ug make-up classes.
Gihangyo usab ang mga pribadong college institutions nga ikonsidera ang suspension sa ilang face to face classes aron malikayan ang epekto sa grabeng kainit.
