BUTUAN CITY – Misaka pa sa 455 ang total confirmed positive COVID-19 cases sa Caraga region,kini human madungan pa og laing 35 ka mga bag-ong kaso sa virus.
Sa online press briefing kagabie gikumpirma ni Dr. Gerna Manatad OIC Assistant regional Director sa Center for Health Development -Caraga nga nadawat sa buhatan ang 146 RT-PCR confirmatory results gikan sa GeneXpert TB Reference Laboratory sa Butuan Medical Center, Southern Philippines Medical Center ug Davao One World, diin sa maong ihap 111 ang tested negative ug 35 ang nasutang positibo sa COVID-19 virus.
Sumala sa ahensya nagsumikad ang mga bag-ong kaso sa probinsya sa Agusan del Sur nga dunay 10 pinaagi sa usa ka syudad niini nga Bayugan nga dunay 4, ug sa mga lungsod nga San Francisco, ug San Luis nga dunay tag duha ug tag-usa usab sa Rosario ug Talacogon. Nakatala usab og duha kaso sa sakit ang probinsya sa Surigao del Norte: pinaagi sa mga lungsod nga Sta. Monica ug Taganaan , ingon man ang probinsya sa Surigao del Sur nga dunay 7 ka kaso pinaagi sa mga lungsod sa San Miguel nga dunay 3, Bayabas 2, ug tag-usa sa Carmen ug Lianga.
Nakatala na usab sa pinaka-unang higayon ang probinsya sa Dinagat Islands og ilang unang pito ka kaso sa sakit nga natumbok sa mga lungsod niini nga Loreto nga dunay 4, Cagdianao (2) ug usa sa San Jose. Samtang , 9 ang nadugang nga kaso dinhi sa Dakbayan sa Butuan, kansa nagsumikad sa mga barangay Agusan Pequeño, Ambago, Bonbon, Buhangin, Dulag, J.P. Rizal, Maon, Villa Kananga ug San Vicente.
Base sa datos mayorya sa mga bag-ong kaso nag-edad sa 20 hantod 40 anyos diin ang pinakabata anaa sa 12 anyos ug 71 anyos ang pinaka-tigulang. Gilangkuban usab kini sa 20 ka mga lalake ug 15 ka mga babaye.
Sa 35 ka mga bag-ong kaso 24 niini ang mga Locally Stranded Individuals, 5 ang local transmission cases sa Butuan City, 3 an mga Returning Overseas Filipinos, 2 ang dunay close contacts sa unang nakumpirmang kaso ug usa ang hospital non-medical worker diin kadaghanan usab sa mga niini asymptomatic.
As of August 22, ang Caraga region aduna nay 455 total confirmed cases diin 333 na ang nakarekober ug nadischarge, 118 ang active cases, ug nagpabilin sa 4 ang namatay.
