BUTUAN CITY – Gikabiliban sa mga manan-aw ang performance ni Karl Eldrew Yulo sa qualifiers niadtong Huwebes sa Croatia, diin ikaduha siya sunod sa American gymnast nga si Kameron Nelson nga nakakuha og 14.300 puntos.
Tungod niini, nakabaton pag-usab og kahigayonan ang batan-ong Pilipino nga makigkompetensya alang sa medalya sa maong prestihiyosong torneo.
Dili kini ang unang higayon nga nakasulod si Yulo sa finals sa World Cup series, tungod kay nakaabot na usab siya sa katapusan nga hugna sa Baku, Antalya, ug Cairo.
Sa miaging mga leg, nakakuha siya og bulawan sa Turkey ug silver sa Egypt, nga nagpakita sa iyang padayon nga pag-uswag sa international gymnastics.
Nakatakda pa nga ipahigayon ang qualifying rounds para sa uban pang apparatuses karong adlawa, diin gilauman nga mudula pag-usab si Yulo alang sa dugang nga kahigayonan nga makasaka sa podium.
Si Karl Eldrew mao ang igsoon sa Olympic double gold medalist nga si Carlos Yulo.
