BUTUAN CITY – Planong magsang-at og resolusyon ni Senador Christopher “Bong” Go sa Senado nga imbistigahan usab nila ang War On Drugs sa Administrasyon ni kanhi Presidente Rodrigo Roa Duterte.
Kini arun duna usay parallel investigation ang Senado taliwala sa nagpadayon nga House Quad Committee hearing mahitungod sa nasangpit nga hisgutanan.
Alayon niini, gitun-an na usab sa kampo sa senador ang pagpasaka og kaso kang kanhi Philippine Charity Sweepstakes Office (PCSO) General Manager Royina Garma human siya gidamay sa gipanumpaang pamahayag niini sa House Quad Committee hearing.
Sumala ni Go, isip special assistant to the President kaniadto, bugtong trabaho lamang niini mao ang pagmugna og mga schedule sa kanhi Presidente. Sama usab sa rason ni Senador Ronald ‘Bato’ Dela Rosa, abli matud pa si Senador Go sa imbitasyon sa kamara alang sa House Quad Committee Hearing, apan girespito niya ang inter-parliamentary courtesy.
Alayon niini gikwestyon usab ni Go kung nganong kaniadto, “standing ovation” pa ang makuha ni Duterte matag-hisgutan niini ang war on drugs tungod sa nakitang maayong impact diha sa katilingban, apan karon, nag-inusara na lang kini tungod sa pulitika.
