BUTUAN CITY – Gideklarang tinuod nga mananaog sa mi-aging barangay elections isip kapitan sa Brgy. Ampayon ning siyudad sa Butuan si Rodencio Balansag Basubas.
Kini ang desisyong gipagawas ni Judge Dennis Castilla sa petisyong giduso ni Basubas alang sa recount sa upat ka mga ballot boxes human siya giparot ni incumbent Kapitan Dennis Felix Gonzaga.
Base sa desisyon, milabaw og siyam ka mga boto si Basubas batuk kang Gonzaga gikan sa gi-recount nga mga balota sa gikan kang sa usa sa upat ka mga ballot boxes kondiin nakatala og 104 ka mga boto si Gonzaga samtang 113 usab ka mga boto ang kang Basubas.
Usa ka ballot box lang matud pa ang gi-recount tungod kay igo na kining makapamatuod nga siya ang midaog sa eleksyon niadtong Mayo ning tuiga kondiin milabaw og 17 ka boto si Gonzaga.
Samtang gibutyag ni Butuan City Councilor John Gil Unay, dili pa pinal ug executory ang desisyon sa korte tungod kay temporaryong kapildihan lang kini sa kabahinan ni Gonzaga ilabina nga duna pa’y igong mga panahon ug paagi aron balihon ang maong disesyon.
Pagbutyag pa sa abogadong konsehal. mamahimo kining i-apila ni Gonzaga ngadto sa COMELEC-Central Office nga kung dawaton, iduso usab sa kini sa COMELEC enbanc ngadto sa Supreme Court nga maoy magpagawas sa pinal nga disesyon. (Beth Ruiz)