BUTUAN CITY – Nasikop sa anti-illegal drug operation ang nagpayuhot sa ginadiling druga sa Purok Sandeya Brgy. Victoria, Tago Surigao del Sur.
Gi-ila ni Philippine Drug Enforcement Agency kon PDEA-Caraga information officer Dindo Abellanosa ang suspek nga Brando Gomez, 26 anyos ug residente sa Brgy. Sta Cruz lungsod sa Marihatag sa maong lalawigan kinsa nakalusot tungod sa iyang quarantine pass.
Sa eksklusibong pakighinabi sa Bombo Radyo Butuan, gibutyag sa opisyal nga nakuha gikan sa iyang posisyon ang 50 gramos sa gidudahang shabu nga gibana-banang mikantidad og kapin sa tunga sa milyon ka pesos kon 590-mil pesos nga gipa-ilalom na sa confirmatory test samtang ang suspek gipa-ilalom usab sa mandatory drug testing aron masayran kung migamit kini sa ginadiling druga.
Ang maong suspetado nataho na kaniadtong nalambigit sa pagpayuhot og illegal nga druga apan wala dayon kini ma-monitor tungod sa kalit nga pagkawala niya sa area ug nailhan usab nga residente kini sa Brgy. Sta Cruz apan nadakpan na kini didto sa Brgy. Victoria.
Gawas sa nakuhang suspected shabu nakuha usab gikan kaniya ang usa ka keypad type cellphone nga maoy gigamit sa iyang mga transaksyon niini.
