BUTUAN CITY – Dili muminus 40 ka mga atleta ning syudad sa Butuan ang gipadala didto sa Oroquita City, Misamis Occidental kagahapong adlawa alang sa pagsalmot sa Batang Pinoy.
Sa pakighinabi ning sibyahan, gibutyag ni Butuan City Councilor Cromwel Nortega, chairman sa Committee on Sports sa Sangguniang Panlungsod ning syudad, nga gipadala nila ang maong mga atleta aron makigtigi sa qualifying leg dinhi sa Mindanao sa Batang Pinoy.
Nasayran nga kini usa ka grassroots program ilawom sa Philippine Sports Commission kungdiin aktibong mipartisipar ang syudad sa ikaduhang higayon.
Matud pa nga makigtigi sa natad sa dulang badminton, swimming, chess, taekwondo ug uban pang sports event ang nasangpit nga mga atleta nga gilangkuban sa mga out-of-school ug in-school youth.
Hinuon, gipaneguro niini nga hugot ang gihimong pagsuporta sa syudad ngadto sa mga panginahanglanon sa mga atleta.
Subay niini, gibutyag usab sa maong opisyal nga lauman na nga ubay-ubay ang mag-scout sa maong event nga gikan sa mga dagkong unibersidad sa nasud aron mupili sa mga atletang adunay potential.
Hinuon, dili usab matud pa kabintahan ang mga atleta nga naggikan dinhi sa syudad tungod kay nahimo man usab kini silang mga top placer sa mga nangaging competition.
