BUTUAN CITY- Nakumpiska sa mga awtoridad sa Australia ang kapin sa 100,000 ka buhing exotic nga uk-ok sa siyudad sa Bathurst, nga maoy labing dakong pagsakmit sa iligal nga mga invertebrate sa kasaysayan sa nasod.
Lakip sa nakumpiska ang Madagascar hissing cockroaches ug dubia cockroaches nga adunay kantidad nga mokabat sa 200,000 Australian dollars, ug gidili ang pag-import, pagtipig, pagpasanay ug pagbaligya niini sa Australia tungod sa posibleng hulga sa biosecurity ug kalikupan. Sumala sa mga opisyal, ang maong mga espesye wala pa masusi pag-ayo ang epekto sa palibot ug mahimong makapakaylap og sakit o makadaot sa lokal nga wildlife.
Gituohang gigamit ang mga uk-ok isip pagkaon sa mga reptilya tungod sa ilang kadako, apan giawhag sa gobyerno ang mga tag-iya sa mga binuhi nga mogamit na lamang og mga cricket o wood roaches. Bisan pa sa dakong kantidad sa nakumpiskang mga insekto, wala pa’y kaso nga gisang-at batok sa breeder, ug gipaabot sa departamento nga patyon ang tanang nakumpiskang uk-ok.
