BOMBO BUTUAN – Nadiskubrehan sa pagpakisusi sa Bombo Radyo Butuan ngadto sa kapulisan sa Bislig City og National Bureau of Investigation kon NBI-Caraga nga na-isyuhan na og 27 ka warrants of arrest ang founder sa organisasyong Kabus Padatoon kon KAPA nga si Joel Apolinario.
Sa nakuhang datus, miabot sa 102 ang complainants batuk kang Apolinario sa kasong syndicated estafa nga wala untay piyansa apan gipa-ubsan ngadto sa estafa dihang gipasaka na kini ngadto sa korte didto sa Bislig City.
Apan adiser pa man napublikar ang warrant of arrest, duna nay kopya ang kampo ni Apolinario hinungdang nakapiyansa gilayon kini.
Ang unang kasong estafa natala niadtong Agosto 24, 2017 samtang ang katapusan niadtong Hulyo 30, ning tuiga.
Una nang giklaro ni Rose Mia Bautista sa Department of Trade and Industry kon DTI-Bislig City sa interview sa Bombo Rady Butuan nga ang wala pagsunod ni Apolinario sa nakalatid sa iyang gi-aplayang business permit ang rason nga gipasira kini sa City Economic Enterprise Department kon CEED sa maong siyudad.
Nagkuha matud pa og business name sa DTI-Bislig si Apolinario niadtong tuig 2016 kinsa nagpa-ilang proprietor sa KAPA Coop Convenience Store and General Merchandise nga nahimutang sa may Brgy. Mangagoy apan dihang gisusi na kini, nasayran nga dunay na-involve nga kwarta rasong gikonsidera kining ilegal.
Gawas pa kini sa kakulang sa mga dokumentong gisubmite niini og gamay pa ang ilang mga gi-display nga paninda kansa dili haum sa deskripsyon sa maong tindahan rason nga girekomenda ang pagpasira niini. (Rolan Janea)
