BUTUAN CITY – Padayon pang gisuta sa kapulisan ang ti-unay nga hinungdan sa kamatayon sa usa ka kanhi sakop sa US Coast Guard human kini napalgang nagbuy-od na sulod sa iyang gisak-ang hotel sa may Brgy. Imadejas ning siydad sa Butuan.
Naila ang biktimang si Ramon Legaspi Burdeos Jr., 83-anyos, residente sa Houston, Texas og pila ka adlaw pa lang nga nag-check in sa usa ka hotel.
Sigon sa gwardiyang si Edgar Ravelo, mitawag matud pa sa front desk ang biktima og nangayo og tabang pasado alas-siete kagahapon sa buntag og dihang ilang girespondihan, nagbuy-od na kini.
Dali kining gidala sa Butuan Doctor’s Hospital apan gideklara kining dead on arrival sa iyang attending physician.
Gisuta pa sa mga otoridad kung duna’y kalabutan sa iyang kamatayon ang iyang gihambin nga cerebro-vascular disease ilabina nga napalgang nagkatag sulod sa iyang hotel room ang mga tambal alang sa iyang sakit. (Beth Ruiz)
