BUTUAN CITY – Padayon karun ang imbestigasyon sa kapulisan sa may Butuan City Police Station-4 may kalabutan sa pagpusil-patay sa kanhe kapitan nga bugtong nalambigit sa narcolist sa PDEA nga barangay official sa Caraga.
Gikumpirma ni Police Senior Inspector Roland Orculio, Hepe sa BCPS-4 nga kaganinang alas 8:30 sa buntag sa may national highway sa Purok-5, Barangay Taguibo ning siyudad sa Butuan, gipusil patay ang biktimang si Benito Salvani Jr, kanhe kapitan sa Brgy. San Antonio, RTR, Agusan del Norte.
Sigon sa hepe nga nagmaneho sa iyang multicab ang biktima sa dihang kini gipusil.
Base sa nakuhang impormasyon gikan sa mga nakasaksi, mipadaplin ang biktima og naka-estorya pa ang suspetsado nga sakay sa single motor ug naka jacket adiser kini gipusil gamit ang kalibre 45 nga pistola.
Padayon pa karung gisuta kung pila ka samad pinusilan ang na-angkon sa biktima nga miresulta sa iyang hinanaling kamatayon.
Kung mahinumduman, mianhe sa sibyahan sa Bombo Radyo Butuan ang maong biktima aron limpiyuhon ang iyang ngalan human kini nalakip sa listahan sa PDEA nga nalambigit matud pa sa ilegal nga drugas.
