BUTUAN CITY – Gikumpirma ni Lt.Col. Isagani O. Criste, ang Battalion Commander sa 29th Infantry “Matatag” Battalion nga na-ilog sa ilang pwersa ang kampo sa mga rebeldeng New People’s Army kon NPA nga maka-accommodate og 50 ka mga tawo.
Kini human ang ilang engkwentro sa bukirang bahin sa Hilong-hilong Complex, Brgy. Mahaba, dakbayan sa Cabadbaran, lalawigan sa Agusan del Norte ning mi-aging adlaw.
Narekober usab sa encounter site ang mga tag-as nga kalibre sa armas sama sa AK47 rifle og M4 rifle apil na ang nagkada-iyang mga bala og mga pagkaon.
Ang maong engkwentro miresulta sa pagkamatay sa usa ka rebelde og pagka-angol usab sa usa ka sundalo nga karong gitambalan na sa Camp Evangelista Station Hospital sa Brgy. Patag, Cagayan de Oro City.
Padayon pang gi-ila ang napatay nga rebelde nga sakop ni Winston Anob alyas Ka Dongkoy sa Sentro De Gravidad (SDG) 21, Guerilla Front Committee (GFC) 21 sa North Eastern Mindanao Regional Committee kon NEMRC.
