BUTUAN CITY – Alerto karon ang Israel dili lang sa ilang kamad-an apan apil na sa kadagatan ug kahanginan bisan og daw milurang na ang gilusad nga drone ug missile attacks sa Iran.
Sa eksklusibong pakighinabi sa Bombo Radyo Butuan, gibutyag ni Bombo international correspondent Shay Kabayan direkta gikan sa Tel Aviv, nga hangtud sa pagkutlo niini nga mga balita, wala’y hunong ang pagsauy-sauy sa mga warplanes sa Israel diha sa kawanangan aron maniid sa posible pang mga drones ug missiles nga itira sa Iran tungod kay dili matud pa nila kini kakumpyansahan.
Aminado si Kabayan nga nakurat siya sa kakapas sa ilang Iron Dome tungod kay sa iyang nasaksihan sulod sa pila ka tuig niyang pagpuyo sa maong nasud, karon pa niya nakita nga 99-porsiento sa mga drones ug missiles nga gitira sa Iran, na-intercept man.
Giklaro pa ni Kabayan nga ang iron dome naglibot sa tanang utlanan sa Israel ug sa tanang mga siyudad rason nga kung duna’y mu-atake sa maong nasud gikan sa bisan asang direksyon, andam kining sugaton sa ilang mga interceptor missiles aron dili makatugpa sa bisan asang dapit sa maong nasud.
