BUTUAN CITY – Magpahigayon ug assesment meeting ang Municipal Disaster Risk Reduction and management Council kon MDRRMC sa Nasipit, Agusan Del Norte aron ma-consolidate ang nakuhang datus kalabut sa gikabalak-ang ibabaw nga bahin sa Kinabjangan River, nga nahimo nang daw dam human nasampongan kini sa nadahili nga bukid, sa Sitio Tinugkaran, Barangay Jaguimitan sakop sa maong lungsod.
Gi-asuy sa Barangay Kapitan sa maong dapit nga si Ireneo Lauro nga lakip sa concern nga gipaabot sa gihimung Barangay General Assembly niadtong sabado, mao ang dakong tubig nga napundo human rockslide nga natigayon.
Ang maong dakong volume sa tubig, ang gikabalak-an sa mga anaa sa daplin sa suba nga mga residente sa Barangay Jaguimitan, Culit, Kinabjangan ug Punta nga parehong sakop sa maong lungsod. Gane tungod sa maong kabalaka, duna nay mga residente nga dili na makatulog ugaling magsugod na ang kagabhi-on ilabina kay dunay hulga nga pag-ulan.
Gelayong gi-adtu kini sa Kapitan kauban ang taga disaster council og nakumpirma ang dakong volume sa tubig nga natigom sa ibabaw nga bahin, nga kung kini mabuswang, seguradong modamyos sa mga anaa sa daplin sa suba nga mga panimalay.
Sumala pa Kapitan Lauro, nga ilang gipaabot ang impormasyon didto kang Mayor Enrico Corvera, og gelayon kining mimandu sa pagkuha ug dugang datus sa maong lugar kauban na ang Mines and Geosciences Bureau, CENRO og MDRRMC.
Sa karun, gihulat nalang ang ipatawag nga meeting aron mahibal-an ang assesment sa mga eksperto ug mahibal-an ang lakang nga pagahimoon alang niini.
