BUTUAN CITY – Magpatuman og hugot nga siguridad ang Commission on Elections kon COMELEC-Butuan alang sa unang adlaw sa filing sa certificate of candidacy kon COC nga magsugod karong adlawa alang sa May 2025 mid-term elections.
Sigon ni Atty. Tristian Niog, election officer ning siyudad, nakig-alayon na ang kapulisan ning siyudad ngadto sa management sa filing venue aron masiguro nga malinawon ang usa ka semana nga kalihukan kansa sugdan sa alas-otso sa buntag ngadto na sa alas-singko sa hapon.
Sa eksklusibong pakighinabi sa Bombo Radyo Butuan, gibutyag sa oisyal nga gila-uman nilang mu-abot sa 120 ka mga indibidwal ang mudalikyat sa ilang buhatan karong adlawa kung duna’y duha ka line-up sa mga partido ilabina sa mga kandidato ang magduso sa ilang COC. Samtang gila-uman sa opisyal nga last day na sa COC filing magdasok ang mga dagkong kandidato, base na sa nangaging katu-igan.
Samtang kagahapon, gila-uman na nilang daan ang dili na kaayo pagdagsa sa mga Butuanons aron magparehistro alang sa May 2025 mid-term elections. Gibutyag ni Butuan City election officer Atty. Tristan Niog nga dili na sama kaniadto ang pagdasok sa mga tawo tungod sa ilang gihimong satellite registration sa mga barangay ingon man sa ilang Register Anywhere Program kon RAP.
Kini ilabina nga wala’y labot sa ilang rehistrasyon karon ang mga sulod na sa Sangguniang Kabataan kon SK elections. Gila-uman nilang sa ilang pagsira ning mga orasa, ilang marehistro ang 700 ka mga bag-ong botante.
