BUTUAN CITY – Gitutukan karun sa kapulisan ang ang-gulong pulitika ug illegal nga drogas sa pagpusil-patay sa konsehal sa lungsod sa Tubod, Surigao Del Norte kagahapon sa ala1:40 sa hapon sa may Purok Silangan, Brgy. Poblacion sakop sa maong lungsod.
Naila ang biktima nga si Felisberto Dumadag Jr. Sigon ni Police Supt. Christian Rafols, Regional Information Officer sa Police Regional Office kon PRO-13, nabutang ang biktima sa high value target sa Tubod Municipal Police Station og Philippine Drug Enforcement Agency diin nalutsan kini ug search warrant sa nakalabay nga tuig 2017 sa mga personahe sa PDEA.
Samtang kanhe kapitan usab kini sa maong barangay nga midagan pagka-konsehal og dunay planong mobalik sa pagka-kapitan.
Sa pagkakarun, padayon pang nangeta ang kapulisan ug witness sa maong panghitabo o kaha CCTV Camera aron mailhan ang mga suspetsado.
Saysay pa ni Police Supt. Christian Rafols, nagtindog lang sa waiting shed ang biktima sa dihang dunay kalit nga miabot nga MIO single motor nga dunay angkas ug dayung pagpaulan ug bala.
Nakahiagum ang biktima ug 12 ka mga samad pinusilan sa lawas diin gidala pa kini sa ospital sa Surigao City apan gideklarang dead-on-arrival sa attending physician.
Narekober sa nahitaboan ang mga basyo sa bala sa punto 45 nga pistola.
