BUTUAN CITY- Gipahayag ni Jeffrey “Ka Eric” Celiz, Secretary General sa Bangon Sambayanan People’s Movement, nga ang debate challenge ni Lovely Granada batok kang Vice President Sara Duterte usa ka katungod sa iyang pagpahayag apan dili kini angay seryosohon.
Sumala pa ni Celiz, nga girespito niini ang katungod ni Granada sa pagpasundayag sa opinyon, apan giklaro nga mabaw ra ang pagsabot niini sa tinuod nga problema sa katawhan ug sa lipunan.
Gipunting ni Celiz nga dili sa debate makuha ang reporma ug kamatuoran, kondili sa kasinatian ug pagbati sa katawhan.
Gibutyag pa niini, nga ang isyu dili bahin kang Sara Duterte o Lovely Granada, kundili sa kahimtang sa nasud nga gipangulohan ni Ferdinand Marcos Jr. ug Martin Romualdez kansa iyang gihulagway nga nagpasulabi sa interes sa ilang kaugalingon.
Gipakita usab ni Celiz nga si Sara Duterte, isip constitutional standby President, adunay potensyal nga makatabang sa pagbangon ug pag-reporma sa gobyerno.
Dugang pa ni Celiz nga bisan dili sila opisyal nga sakop sa Code of Generation Ethics, isip mga social media ug political commentators adunay gihapon matud pa silay obligasyon nga mahimong matinud-anon ug responsable sa paggamit sa ilang katungod sa pagpamahayag.
Gipunting niini nga tungod kay adunay sila audience ug monetization sa Facebook ug YouTube, kinahanglan nga disente, propesyonal, ug makatarunganon ang ilang pagpahayag aron makahatag ug tinuod nga impormasyon sa katawhan.
Gani, bisan dili sila bound sa pormal nga pamalaod sa broadcasting ethics, kinahanglan gihapon matud pa sila magpaka-obhetibo, magpaka-punctual, ug magpakatinuod sa ilang mga opinyon ug pagpanghimatuod tungod kay ang ilang plataporma nakaabot sa daghang sektor sa katawhan, kansa nagkinahanglan sa responsable nga pamahayag
