BUTUAN CITY – Mi-abot sa 98 ka mga pamilyang lumad ang mikagiw gikan sa Sitio Ibuan, Brgy. Mampi, lungsod sa Lanuza, Surigao del Sur aron dili mabutang sa delikado ilang kinabuhi human matud pa gihulga sa mga rebeldeng New People’s Army kon NPA.
Sa sulat-pamahayag nga gipagawas sa 402nd Infantry ‘Stingers’ Brigade, Philippine Army, gibiyaan sa 351 ka mga indibidwal ang ilang mga pinuy-anan pasado alas-12:20 kagahapon sa hapon og temporaryo unang nagpuyo sa gymnasium sa Brgy. Agsam sakop sa maong lungsod.
Sigon ni Brgy. Chairman Allan Juagpao, midalikyat matud pa sa ilang lugar ang mga rebelde niadto pang Pebrero 16 og gibarahan ang siyam ka mga pamilyang duna’y anak nga mag-sundalo nga mupahawa na lang sa maong lugar kung ipadayon ang ilang tinguhang mahimong kabahin sa tropa sa gobyerno.
Tungod niini, naglusad na og relief distribution ang lokal nga kagamhanan uban sa 36th Infantry Battalion. Sigon ni Brigadier General Franco Nemesio Gacal – kumander sa 402nd Infantry Brigade, ang pagpanghulga sa mga lumad, usa ka desperadong lakang na sa mga rebelde kansa usa ka pagpig-ot sa katungod sa mga lumad nga magpuyong malinawon.
Uban matud pa sa lokal nga kagamhanan sa Lanuza, ilang i-facilitate ang luwas nga pagbalik sa mga lumad ngadto sa ilang tagsa-tagsa ka pinuy-anan. (Beth Ruiz)
